Lamkai deihuoi leh deithusam

- T. Gouzadou, Ex-Minister, Zoveng, Lamka

Pasian in vaihawmte lungsim tungtawn a theina leh ngaituo siemna ahing guon a Zou sung a, Pi Vom ta Pi Kang ta chi umlou kei a pumkhat a peikhawm thei ding a lungtup ang neisah thei tahziehin amasa’n Ama tungah nuomthu tung hen. I nam sung a President kitel ding toh kisai in thu themnou khat tahlat nuom ka nei hi.

1. “Leitung vaihawm zousie, thuphuong tute leh Pasalpha zousie keima kithuohpina a vai ahawm na asep uh ahi hi” Thupilte 8:16. Tuachi ahileh ei Zoute’n vaihawmtu ding hoitah i telthei leh i nei theina ding un bang e a kitasam leh poimaw sui masa va ui. “Dihtatna in nam a tawisang hi” Thupilte 14:34 in ana chi khu thupi in mang masa lei Pasian in thudih leh vaihawmtu deihuoitah ahing guotpieh ding hi.

2. Na lamkaipa ding khu na theichien mama kul leh pawimo vawt ahi. Bang chibang mihing ahiei? Koi tobang mihingte toh kithuo leh kikhutzopna neimi ama? Sa-le-gal nei mihing ahiei? Ama ziehin chi-le-nam tualeh nautangte’n bang chi bang gentheina ahiei, ahisih leh nopna nei in athuohkha ta uoi? chite suichien mama angai hi. Khut kem nei, nehguh-tahguh hat ahisih leh zuou thu a misol chiing ahiei chite zong theichien ahoi hi.

Aman’n Nampi hing pawta leh mite toh namdang) kitheisiemlouna ahing pieng thei chi ama ahisihleh kituohna umsahtheimi ama chite bang zong gel ding a kul leh poimaw ahi.

3. Sum-le-pai zang a mihem sawmmi ama, ahisihleh sum-lepai tungtawn a thuneina neisawm mihing ahiei chite zong a poimaw hi. Sum ang tuleh sum ma luoh ang sawm ngei ding chi zong mipi’n i theisiem uh a poimaw hi. Sum vanzah in zang vang chi khu sietna pawlut vang china toh kibang ahi giap hi. Leitung hinkhuo ah sum-le-pai zieh ahi mite kisietna leh thudih in vai a hawm theilouna. Chi-lenam zuohtu hilou a kembittu leh kemhoitu ding ahi angai hi.

4. “Itna chilou koima bangma basih un” (Bible). Ahileh unau, tuin nang-le-ken itna toh kisai in sil tampi i bawlkhiel in bawlhoi kha ta maithei hi. “A unau muda khu tuolthat ahia, tuolthat in kumtawn hinna anei sih chi zong na thei uhi” (I John 3:15). “Koi ahiei Pasian ka it hi achi a a unau a muda leh mizuou ahi hi. Aziehpen a muthei a unau khu a it sih leh a mu nailou Pasian khu bang a chi it thei ta diei?” I John 4:20). Pasian thu pen i awi thaw ua, i zuisih uhi. “ Mangpa’n a mite a thei a, koi zong Mangpa a ka hi chite’n sil hoilou lah ah akikoi ching thei hi” 2 Timothi 2:19. “Na neulai apat in Laisiengthou khu pilna hing pie, Khrist Jesu ginna zieh a hutdamna lampi ah ang pui hi chi theizing na teh. Laisiengthou zousie Pasian huha khum ahia, thutah kihilna ding mawng ahi hi. Dihloute phawh in, khielte sudih in, hindan a hoi theina ding in thu a pie hi” 2 Timothi 3:15- 16. Thudih leh zui ding kilawm thute hil nahsang a zuou-le-nal a nasemtute zuizui te bangchin mipi Belampu ahi thei ding uoi chi zong gelthei sil khat ahi.

5. Dihtatna pen tu tinten chiet va ui. Mi’n bang chi bang in sum-le-pai in hing hem sawm nanleh zong pangdet va ui. Azieh khu Bible in “Dihtatna zieh a bawlsietna thuohte a hampha uhi. Vangam amau a ding ahiman in” (Matt. 5:10) ana chi hi. Keima’n bangchih lai a zong Zou tate a ding a ka thuumna leh ka nget zing ahi; “Bangkim bawl thei Mangpa Siengthou leh dihtah aw, Vannuoi mite tung a thukhen a, kou hing thatte na gawt hun ding bangtan vei kisam nalai ahiei?” chi khu ahi. Unau kituohlou kituohsah thei tute leh kilemsah tute khu lamkai dingte nasep leh silbawl dia kilawm ahi hi. Mi a unau toh Bible deidan a ahinna uh kipethei khop a ahing kilungsiet leh kipahpi a ettonching a lah ding ahizaw hi. Khumbang mite sang a a unau ama let leh lal na ding a that ngamte lamkai dih ichi zaw ding uh amale? Bang e nang na telzawh theinop huoi kasa hi.

Zoute pen tunitan in Pasian lungsietna zal in Nam hoi, Sisan suolou nam ihi uhi. Tuaziehin nampi lamkai ding leh puitu ding khu bang chi bang mi ahi ding ahiei chi khu ngaidan atha in tahlang kia lei ut huoi kasa hi.

(i) Sa-le-gal nei mihing ahiei, ahisihleh akhut a sisan baang mihing ahiei suichien ahoi ding hi.
(ii) Zou dihtah ahinai mah? A phung-atang in namdang chidang toh kizopna anei eima suichien ding ahi.
(iii) Ama pen khu Nam lamkai hitaleh chidang-namdang te’n bang chiin a gel ding uoi? Chidang-namdang in itung uah thuneina a nei ding uoi ahisihleh angho ding uoi suichien ding ahi.
(iv) Sum-le-pai ngaina mi ahiei? ahisihleh sum a let-le-lal sawm/ tup mi ama? Sumhat a nasep sawm mi ama, sum a mihem chiing mi ama? Sum ziehin minsietna bang zat a neikha tai?
(v) Dihtatna ngaisang mi ahiei? Ahisihleh zuou-le-nal a misol ching mi, kamsiem a mihem ching mi ahiei, akam a mi kipahsah a alungsim tahtah gulgu bang a chite uh ahiei suichet a ngai hi.

Lamkai deihuoi leh duthusam neina ding in Belampute leh Zou sung a Officer um te’n mopuohna lienpi nei diehdieh in thei ing e. Azieh khu i mipite pen sol thei leh sum-le-pai a hem thei ahizieh un. Amaute theilounate a lampi hil leh kawhmu thei ding a um khu Belampute leh Officer te ahi giap ua, amau ahoi uleh lamkai hoi inei ding ua, ahoilou uleh lamkai sie leh gilou i nei ding uh ahimai hi. Amaw teng amau te’n asi-asen a alubuh ua a kipuoh mai ding uh! Ahoi leh apha i nei a ahileh amaute’n patatna akitan mai ding un thei ing. Mangpa’n simtute tengteng a tha in hing guolzawl tahen.

Khristian Tangkou | Vol. 38 | No. 05 & 06 | May & June, 2012